විශේෂාංග

මෙවර මව්වරුන් ගේ දිනය හුදු සමාජ මාධ්‍ය සටහනකට හෝ සුබපැතුමකට පමණක් සීමා කර අමතක කර දැමීමට අපට නොහැකි ය. මන්ද, අපේ රට සිය මෑත කාලීන ඉතිහාසයේ වඩාත්ම තීරණාත්මක කාලපරිච්ඡේදයකට මුහුණ දී සිටින බැවිනි.

අපේ මව්වරුන් අද නිරත වී සිටින්නේ නිහඬ යුද්ධයක ය. දිනෙන් දින ඉහළ යන බඩු මිල හමුවේ දරුවන්ට වේලක් පිරිමසා දීමටත්, අනාගතය අවිනිශ්චිත වෙද්දී ඔවුන්ට ගුණාත්මක අධ්‍යාපනයක් ලබා දීමටත් මව්වරු අප්‍රමාණව වෙහෙසෙති. නමුත් අද මේ රටේ මව්වරුන්ගේ බලාපොරොත්තු බිඳ වැටෙමින් පවතී. මැතිවරණ ජයග්‍රහණය සඳහා ඔවුන්ව දේශපාලන පළිහක් ලෙස භාවිතා කළේ ය. ඔවුන්ගේ දුක්ඛිත තත්ත්වය ඡන්ද කොල්ලයටත්, ඔවුන්ගේ කැපකිරීම් සටන් පාඨවලටත් සීමා විය. අද දේශපාලකයන් බලය සමරද්දී, මව්වරුන් පීඩාවෙන් මිරිකෙමින් සිටිති. වසර තිහක කුරිරු යුද්ධයේ දී තමන් ගේ දරුවන් කුමන පාර්ශවයක සටන් කළත්, අවසානයේ පීඩා වින්දේ මව්වරුන්ය. 88/89 භීෂණ සමයේ ජවිපෙ කැරැල්ලේදී "දේශපාලනය" නමින් තරුණ ජීවිත දහස් ගණනින් මකා දමද්දී, දෘෂ්ටිවාදයන් ඉදිරියේ මනුෂ්‍යත්වය ඝාතනය වෙද්දී වැඩිපුරම කඳුළු සැලුවේ අපේ මව්වරුන් ය. එහෙත් අපේ මව්වරු නොසැලී සිටියහ. ඔවුන්ගේ එකම අභිලාෂය වූයේ තම දරුවන් වෙනුවෙන් සහ රට වෙනුවෙන් යහපත් අනාගතයක් ගොඩනැගීමයි.

සර්වජන බලයේ, ලිය බලය දැන් පෙරමුණ ගත යුතුය. ඔවුන්ගේ වගකීම වන්නේ ජනතාව ගේ අරගල හමුවේ "මවකගේ භූමිකාව" නිරූපණය කිරීමයි. ආරක්ෂා කිරීම, පෝෂණය කිරීම සහ උරුම කර දීමට වටිනා අනාගතයක් වෙනුවෙන් සටන් කිරීම ඔවුන්ගේ වගකීමයි.

වර්තමාන අවුල් සහගත තත්ත්වය තුළ, සර්වජන බලයේ නායකයින්ට එරෙහිව ජවිපෙ රජය මර්දනය සහ තර්ජන මුදාහරිමින් සිටිය දී, එක් කාන්තාවක් නිහඬව ම සුවිශේෂී ජයග්‍රහණයක් අත්කර ගත්තා ය. ඒ ජ්‍යෙෂ්ඨ නීතීඥ චාන්දනී දයාරත්න යි. ඇය පළමු වරට මැතිවරණයකට ඉදිරිපත් වී, පළමු වරටම නීතිඥ සංගමයේ විධායක සභික ධුරයක් දිනා ගත්තා ය. නීතිමය ආයතන බලයට වඩා ප්‍රතිපත්තිවලට මුල්තැන දිය යුතු මෙවැනි තීරණාත්මක මොහොතක ඇයගේ හඬ අතිශය වැදගත් ය.

නිහඬ චරිතයක් වන චාන්දනී, සර්වජන බලය තුළ ඇති වෙනස්ම ආකාරයේ ශක්තියක් නිරූපණය කරයි. අනුරාධා යහම්පත් පක්ෂයේ ප්‍රසිද්ධ කාන්තා නායකත්වයේ මුහුණුවර නම්, නිර්භීත, චතුර සහ නොබියව අදහස් දක්වන චාන්දනී නියෝජනය කරන්නේ නිහඬ කාන්තා නායකත්වයයි. වේදිකාවලට වඩා තිරය පිටුපස සිට යටිතල පද්ධතීන් ගොඩනගන, ප්‍රතිපත්ති රාමු නිර්මාණය කරන හා පාලක මණ්ඩල තුළ සටන් කරන කාන්තාවන් ඇය නියෝජනය කරයි. මේ දෙදෙනාම සමානව වැදගත් ය.

අනුරාධා සහ චාන්දනී දෙදෙනාම තේරුම් ගත යුත්තේ තමන්ට දැන් පෞද්ගලික අභිලාෂවලට එහා ගිය වගකීමක් ඇති බවයි. ඔවුන් ගේ සටන තමන් ගේ දරුවන් ගේ අනාගතය සුරක්ෂිත කිරීමට පමණක් සීමා නොවිය යුතුය. ඔවුන් මේ රජය විසින් ක්‍රමානුකූලව විනාශ කරන රටේ සියලුම දරුවන් වෙනුවෙන් "මව්වරුන්" විය යුතු ය.

අද රට ආර්ථිකව, ආගමිකව සහ සදාචාරාත්මකව කඩා වැටෙමින් තිබේ. මේ කුළුණු තුනම කඩා වැටෙද්දී කුමන මවක්ද නිහඬව බලා සිටින්නේ? තම දරුවන්ගේ අනාගතය සොරා ගන්නා විට එය ඉරණම යැයි පිළිගන්නේ කුමන මවක්ද? මෙය සර්වජන බලයේ ඉදිරියෙන්ම සිටින පිරිමින්ට පමණක් අදාළ කතාවක් නොවේ. මෙය ගම් මට්ටමේ, සර්වජන සභාවල, ප්‍රතිපත්ති සම්පාදක කාමරවල සිට උපාය මාර්ග සකසන දහස් සංඛ්‍යාත කාන්තා නායකත්වයන් පිළිබඳ කතාවයි. ඔවුන් ගේ නම් සමාජ මාධ්‍යවල ප්‍රසිද්ධ නොවන්නට පුළුවන, නමුත් ව්‍යාපාරය පවතින්නේ ඔවුන් ගේ වැඩකොටස මත ය. ඔවුන් ගේ උරහිස මත ය. මේ රටේ කාන්තාවන් වරින් වර පාවාදීම්වලට ලක්ව ඇත. "බලගැන්වීම" පොරොන්දු වී ඔවුන්ට ලැබුණේ නාමික සැලකීම් පමණි. ආරක්ෂාව පොරොන්දු වී ලැබුණේ සූරාකෑමයි. සමානාත්මතාවය වෙනුවට ලැබුණේ රඟපෑම් පමණි.

අනුරාධා, චාන්දනී සහ ලිය බලයේ සිටින සෑම කාන්තාවකගේම මොහොත මෙයයි. මාතෘත්වයේ ශක්තිය අවශ්‍ය වී ඇති මේ රට වෙනුවෙන් වගකීම භාරගන්න. අවසර ඉල්ලීමෙන් හෝ ඉඩක් ඉල්ලීමෙන් පලක් නැත. වගකීම ඔබේ කරගන්න. මව්වරුන් කරන්නේ දරුවන් හැදීම පමණක් නොවේ. ඔවුහු ජාතීන් ගොඩනගති. යටත් වීම හැර අන් මගක් නැතැයි සිතෙන විට ඔවුන් නොසැලී සිටීමට උගන්වති. බිය දැනෙන විට ධෛර්යය පෙන්වති. වර්තමානය බලාපොරොත්තු රහිත වන විට අනාගතය ආරක්ෂා කරති. ශ්‍රී ලංකාවට අද අවශ්‍ය වන්නේ ඒ මාතෘත්වයේ ශක්තියයි. තර්ජනයට ලක්ව ඇති ජාතියක් ආරක්ෂා කිරීමට ඉදිරිපත් වන, කිසිදු පටු අරමුණක් නැති, අව්‍යාජ මව් සෙනෙහසේ රැකවරණය යි. සංකේතාත්මක නියෝජනයන්ගේ කාලය අවසන්ය. රඟපෑම්වලින් කාන්තාවන් බලගැන්වීමේ කාලය ගෙවී ගොස් ඇත. සර්වජන බලයේ කාන්තා නායකත්වය වටහා ගත යුත්තේ, තවදුරටත් බලා සිටීමට කාලයක් නොමැති බවයි.

රජය දූෂිතය, විපක්ෂය මත් වී ඇත, ආගමික නායකයන් නිහඬය. ජනතාව, විශේෂයෙන්ම මව්වරුන්, අසරණ වී සිටිති. ලිය බලයට නැගි සිටිමට කාලය පැමින ඇත. ඒ සඳහා සුදුසුම වේලාව හෝ පහසුව නොබලා, එය අත්‍යවශ්‍ය බැවින් නැගී සිටින්න. මේ රටට අත්‍යවශ්‍ය වන ඒ සැබෑ "මව්වරුන්" වන්න. ඔබට උරුම නොවන අනාගතයක් වෙනුවෙන් සටන් කරන්න. දහස් ගණන් මව්වරුන් පරම්පරා ගණනාවක් තිස්සේ කළ කැපකිරීම්වලට සාධාරණයක් ඉටු වන ජාතියක් ගොඩනගන්න.

නවම් මීගොඩ