විදෙස්

චීනයේ උත්තරීතර විද්‍යා හා තාක්ෂණ සම්මාන ප්‍රදානෝත්සවය චීන ජනාධිපති ෂී ජින්පිං ගේ ප්‍රධානත්වයෙන් ඊයේ (08) බෙයිජිංහි මහජන මහා ශාලාවේ දී පැවැත්වුණි.

චීන විද්‍යා හා තාක්ෂණය පිළිබඳ ඇගයීමේ සම්මේලනය, චීන විද්‍යා ඇකඩමියේ හා චීන ඉංජිනේරු ඇකඩමියේ විද්වතුන්ගේ සම්මේලනය සහ චීන විද්‍යා හා තාක්ෂණ සංගමයේ 11 වන ජාතික නියෝජිත සම්මේලනයේ දී හෙතෙම සම්මානලාභීන් වෙත සම්මාන ප්‍රදානය කරමින් වැදගත් දේශනයක් ද සිදු කළේ ය.

15 වන පස්අවුරුදු සැලසුම් කාලය, විද්‍යා තාක්ෂණයෙන් රට බලගැන්වීමේ වැදගත් අදියරක් බව ෂී ජින්පිං ජනාධිපතිවරයා පෙන්වා දුන්නේ ය. ඓතිහාසික අවස්ථා ප්‍රයෝජනයට ගෙන නව යුගයේ අභියෝගවලට මුහුණ දෙමින් උසස් මට්ටමේ විද්‍යා තාක්ෂණික ස්වාධීනත්වය ළඟා කර ගැනීම කඩිනම් කළ යුතු බවට ද ඔහු උපදෙස් දී ඇත.

වසර 2035 වන විට විද්‍යා තාක්ෂණික අංශයෙන් බලවත් රටක් ගොඩනැගීම පිළිබඳ ඉලක්කය කරා ස්ථිර ව ගමන් කරමින් විද්‍යා තාක්ෂණික නවෝත්පාදනයෙන් චීනයට ආවේණික නවීකරණය ප්‍රායෝගික ව ඉදිරියට ගෙන යා යුතු බව ද ඔහු අවධාරණය කර ඇත.

මෙම උත්සවයේ දී ෂී ජින්පිං, උත්තරීතර විද්‍යා හා තාක්ෂණ සම්මානයට හිමිකම් කියූ චීන විද්‍යා ඇකඩමියේ භෞතික පර්යේෂණ ආයතනයේ විද්වතෙකු වන Chen Liquan සහ චීන ‍ඉලෙක්ට්‍රොනික් විද්‍යා තාක්ෂණ කණ්ඩායමේ 14වන පර්යේෂණ ආයතනයේ විද්වතෙකු වන Ben De වෙත සම්මාන පදක්කම් සහ සහතික පත්‍ර පිරිනමා ඔවුන්ට සුබ පැතීම ද විශේෂත්වයකි.

මූලාශ්‍ර - itnnews