පුවත්

සෞඛ්‍ය සේවා අධ්‍යක්ෂ ජනරාල්වරයා විසින් තවත් කොරෝනා මරණ 15 ක් වාර්තා කිරීමත් සමග සමස්ත මරණ සංඛ්‍යාව 13,856 ක් දක්වා ඉහළ ගියේ ය.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 08 දෙනෙකු පිරිමි පුද්ගලයින් වන අතර ඉතිරි 07 දෙනා කාන්තා ආසාදිතයින් ය.

මිය ගිය පිරිස අතර වයස අවුරුදු 30 – 59 ත් අතර වයසේ පසුවන ආසාදිතයින්‍ 3 දෙනෙකු සිටින අතර ඉතිරි ආසාදිතයින් 12 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (07) වාර්තා කරන ලද මෙම මරණ 15 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

නව කොරෝනා ආසාදිතයින් 626

මේ අතර, අද (07) දිනයේ නව කොරෝනා ආසාදිතයින් 626 දෙනෙකු හඳුනා ගත් බව රජයේ ප්‍රවෘත්ති දෙපාර්තමේන්තුව පවසයි.

ලිට්‍රෝ ගෑස් හිඟය සම්බන්ධයෙන් පලමුව කියවුනේ ඩොලර් හිඟය වුවත් එය වත්මන් ආණ්ඩුව පත්කළ හිටපු සභාපති වෙත සැකය යොමුවන ආකාරයක් පෙන්නුම් කරන අතර එය එකිනෙකාගේ කෙහෙවළු පටලවා ගැනීමක් බවට පත්ව ඇත.

මතුවූ ගෑස් හිඟයට හේතුව ඩොලර් හිඟය බව මුල් අවස්ථාවේදී ආණ්ඩුවේ ගෑස් සමාගම ප්‍රකාශ කළ ද ගෑස් සමාගමේ සභාපති තෙෂාර ජයසිංහ පසුගියදා අනාවරණ කළේ ගෑස් වෙළඳපොළේ ආශ්‍රිතව ක්‍රියාත්මක වන මාෆියාවක් ඊට හේතුවූ බවයි.

”ගෑස් නැව මෙතනට ඇවිල්ලා තිබ්බා. ඔවුන් අපට තර්ජනය කරා. ගෑස් දෙන්න බැහැ. උඹලා මේ contract එක තව අවුරුදු දෙකකට දික් කරන්නෙ නැත්නම් කියලා. ඒකට අකමැති වීම නිසා, එය තර්ජනයට මුහුණදීම නිසා සභාපතිවරයා සහ අධ්‍යක්ෂ මණ්ඩලය බිත්තියට හේත්තු කිරීම නිසා, මට සිද්ධ වුණා. අතිගරු ජනාධිපතිතුමාගේ උපදෙස් ලැබෙන කල් කෙසේ හෝ මේ තත්ත්වය සමනය කරගන්න”

ඊට ප්‍රතිචාර දක්වමින් ගෑස් මාෆියාව සම්බන්ධයෙන් වහාම ස්වාධීන පරීක්ෂණයක් පවත්වන්නැයි ලිට්‍රො සමාගමේ හිටපු සභාපති අනිල් කොස්වත්ත ලිපියක් මගින් මුදල් අමාත්‍යාංශයට දැනුම් දී තිබේ.

වත්මන් ලිට්‍රෝ සභාපති පවසන්නේ හිටපු සභාපති ගේ ගෑස් ගිවිසුම හරහා කෝටි 1000ක වංචාවක් සිදුව ඇති බවකි.

හිටපු සභාපතිවරයා පරීක්ෂණයක් ඉල්ලා ඇත්තේ ඉන් හෙළි කළ කරුණු සම්බන්ධයෙනි.

ගෑස් මාෆියාව හෙළිදරව් කරන්න : ජවිපෙන් අභියෝගයක් !

මේ අතර ජනතා විමුක්ති පෙරමුණ ප්‍රශ්න කර සිටින්නේ, ලිට්රෝ සභාපතිවරයා පවසන ආකාරයට ජනතාව අපහසුතාවයට පත්කරමින් වෙළඳපොළේ ගෑස් හිඟයක් ඇති කිරීමට මූලික වූ පුද්ගලයින් කවුරුන් ද යන්න රටට හෙළිදරව් කිරීම සභාපතිවරයාගේ වගකීම බවයි.

”දැන් ප්‍රශ්නය තියන්නේ කවුද මේ හොරකම් කරන්නේ. කවුද මේ පිටිපස්සේ ඉන්නේ. ඇමතිවරයාද රාජ්‍ය ඇමතිවරයා ද නැත්නම් ඊටත් ඉහළින් කවුරු හරිද මේ හොරකම් පිටිපස්සේ ඉන්නේ. එහෙම නිකන් පාවෙන කතා කියලා හරියන්නේ නැහැ”

ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත් අවධාරණය කර සිටින්නේ, කාගේ බලපෑමට ද මේවා සිද්ද වෙන්නේ කියලා මේ රටේ ජනතාව දැනගන්න කැමතියි. මීට අදාළ තොරතුරු සොයා ගත් වහාම ඊට අවශ්‍ය නීතිමය පියවර ගන්නා බවයි.

”ඒ අවශ්‍ය කරන තොරතුරු ලියකියවිලි හොයා ගත්ත ගමන් ඒකට අවශ්‍ය කරන නීති පියවර ගන්න අපි අනිවාර්යයෙන්ම මැදිහත්වෙනවා. ප්‍රශ්නය තියන්නේ ආණ්ඩුවල දේශපාලන හයියෙන් මේ හොරකම් වංචා යට කරනවා. ලිට්රෝ ගෑස් පිටිපස්සේ තියන ඔය කියන හොරකමක් යට වෙන්න පුළුවන් මොකද හොරු රකින්නෙත් මේ කට්ටිය”

දැනට අතිශය පාඩු ලබමින් සිටින ශ්‍රී ලංකන් ගුවන් සේවය පෞද්ගලික අංශයට පැවරීමට රජයේ අවධානය යොමුව ඇතැයි ආණ්ඩුවේ අභ්‍යයන්තර ආරංචි මාර්ග පවසයි.

කෙසේ වුවද ශ්‍රී ලංකා ගුවන් සේවය සතුව අංශ 5ක් ඇති අතර ඉන් භූමි මෙහෙයුම් අංශය හා ගුවන් භාණ්ඩ අංශය ඇමරිකානු ඩොලර් මිලියන 100 ක පමණ ආදායමක් වසරකට ලබන බව පැවසේ.

කොවිඩ් වසංගතය හේතුවෙන් ගුවන් යානා ලීසිං ගෙවීම, ඉන්ධන වියදම සහ අනෙකුත් වියදම් බරපතළ ලෙස ඉහල යාම නිසා සේවාව පාඩු ලබමින් ඇතැයි ශ්‍රී ලංකන් ගුවන් සේවයට සම්බන්ධ ආරංචි මාර්ග පවසා සිටී.

ශ්‍රී ලංකන් ගුවන් සේවයට අයත් එක් ගුවන් යානාවක් සඳහා මසකට ඇමෙරිකානු ඩොලර් ලක්ෂ 5-8 කටත් අතර ප්‍රමාණයක් ලීසිං වාරිකය ලෙස ගෙවීමට සිදු වන බව පවසන එම ආරංචි මාර්ග ගුවන් යානා මෙහෙයුම සඳහා වැයවෙන සමස්ත වියදමින් 25% ක් ඉන්ධන සඳහා දැරීමට සිදුවන බවද පැවසේ.

එආ අනුව රජයේ අවධානය යොමු වී ඇත්තේ ශ්‍රී ලන්කන් ගුවන් සේවයේ පාඩුව රටට විශාල බරක් වී ඇති නිසා රජයට යම් කොටස් ප්‍රමාණයක් රඳවා ගෙන ඉතිරිය පුද්ගලික අංශයට පැවරීමට බව ආණ්ඩුවේ ආරංචි මාර්ග පවසා සිටී.

ඒ අනුව එළැඹෙන 09 වන දා වන විට මේ සම්බන්ධයෙන් යම් තීරණයකට එළඹීමට නියමිතව ඇති බවද එම ආරංචි මාර්ග පවසා සිටී.

lanka lead -

එක රටක් එක නීතියක් කාර්යසාධන බලකායට ඥානසාර හිමියන් පත්කර තිබෙනවා. එම බලකායේ එක් කටයුත්තක් තමයි එක රටක් එක නීතියක් සඳහා නීති කෙටුම්පතක් ඉදිරිපත් කිරීම. මේක පුදුම සහගත දෙයක්. ඥානසාර හාමුදුරුවෝ අධිකරණයට අපහාස කරලා සිරදඩුවම් නියම කරලා හිරේ ඉන්නකොට ජනාධිපති සමාවක් මත එළියට ආපු අයෙක්. එවැනි අයෙක් නීති සකස් කරන්න කමිටුවකට පත්කිරීම නීතිය හෑල්ලුවට, විහිළුවට ලක්කිරීමක්. නීතිය ජනතාවට එපාකරවන්න කරන වැඩක් කියලයි අපිට හිතෙන්නේ. එය තවත් බරපතල වන්නේ අධිකරණ ඇමති විසින් පත්කළ විශේෂඥ පිරිසක් කෙටුම්පතක් සකස් කර තිබියදී මේ පත්කිරීම සිදුකිරීමයි.” යැයි ජාතික ජන බලවේගයේ නායකත්ව මණ්ඩල සාමාජික නීතිඥ ලාල් විජේනායක පවසයි.

ඔහු මේ බව පැවසූවේ බත්තරමුල්ල, පැලවත්ත හි පිහිටි ජනතා විමුක්ති පෙරමුණේ ප්‍රධාන කාර්යාලයේදී ඊයේ (06) පෙරවරුවේ පැවති මාධ්‍ය හමුවක් අමතමිණි.

එහිදී වැඩිදුරටත් අදහස් දැක්වූ ජාතික ජන බලවේගයේ නායකත්ව මණ්ඩල සාමාජික නීතිඥ ලාල් විජේනායක,

“අපේ රටේ ව්‍යවස්ථා සකස්වී තිබෙන්නේ ප්‍රජාතන්ත්‍රවාදී පාලනයක් ගෙන යෑම සඳහායි. එවැනි පාලනයක් ගෙන යෑම සඳහා ස්වාධීන අධිකරණයක් අවශ්‍යයි. ස්වාධීන අධිකරණයක් සඳහා නීතියේ ආධිපත්‍ය තහවුරු විය යුතුයි. ඒ වගේම නීතියේ ආධිපත්‍ය තහවුරු වීමට ස්වාධීන අධිකරණයක් අවශ්‍යයි. ඒ සඳහා නීතියට සාධාරණත්වයට ගරුකරන පරිපාලනමය ක්‍රියාවලියක් සහිත ආයතනයක් අවශ්‍යයි.

පහු ගිය කාලයේ දීර්ඝ වශයෙන් විමර්ශන පවත්වා නඩු පැවරීම සඳහා වගකීම ඇති නීතිපති දෙපාර්තමේන්තුව සහ නීතිපතිවරයා විසින් බැසිල් රාජපක්ෂට, කරන්නාගොඩගට, ප්‍රේමලාල් ජයසේකරකට බරපතල චෝදනා සහිත නඩු පවරලා තිබෙනවා. ඒ නඩු අධිකරණය ඉදිරියේදී ඔප්පු කරන්න පුළුවන් කියන විශ්වාසය සහිතව තමයි නීතිපතිවරයා මේ නඩු ගොනු කළේ. ඒ නඩු සියල්ල ගොනු කරලා තිබෙන්නේ දැන් ඉන්න අග්‍රවිනිස්චයකාරතුමා නීතිපතිව සිටියදීයි. ඒ නඩු අහන්න යනකොට දැන් ඉන්න නීතිපතිවරයා යටතේ නීතිපති දෙපර්තමේන්තුව නඩු ඉල්ලා අස්කර ගන්නවා. මේක මේක සම්පූර්ණයෙන්ම නීති පද්ධතියම විහිළුවට ලක්කිරීමක්. දේශපාලන බලපෑම් මත තමයි මේ නඩු ඉල්ලා අස්කර ගන්නට යන්නේ කියලා පැහැදිලියි. නීතිපති සහ නීතිපති දෙපාර්තමේන්තුව දේශපාලන බලයට යට කළොත් ඒ එටේ නීතියේ ආධිපත්‍යයක් ඉතිරි වෙන්නේ නැහැ. ඒ නිසා මේක ඉතාම බරපතල ප්‍රශ්නයක් අපේ රටේ අනාගතයට. මේක අපි දැඩි ලෙස හෙලා දකිනවා. ඒ වගේම මේක වෙනස් කළ යුතුයි. නීතිඥ ප්‍රජාව වගේම ජනතාවත් මේකට විරුද්ධ විය යුතුයි.

ඒ වගේම තවත් බරපතල කාරණයක් තිබෙනවා. ඒ තමයි එක රටක් එක නීතියක් කාර්යසාධන බලකායට ඥානසාර හිමියන් පත්කර තිබෙනවා. එම බලකායේ එක් කටයුත්තක් තමයි එක රටක් එක නීතියක් සඳහා නීති කෙටුම්පතක් ඉදිරිපත් කිරීම. මේක පුදුම සහගත දෙයක්. ඥානසාර හාමුදුරුවෝ අධිකරණයට අපහාස කරලා සිරදඩුවම් නියම කරලා හිරේ ඉන්නකොට ජනාධිපති සමාවක් මත එළියට ආපු අයෙක්. එවැනි අයෙක් නීති සකස් කරන්න කමිටුවකට පත්කිරීම නීතිය හෑල්ලුවට, විහිළුවට ලක්කිරීමක්. නීතිය ජනතාවට එපාකරවන්න කරන වැඩක් කියලයි අපිට හිතෙන්නේ. එය තවත් බරපතල වන්නේ අධිකරණ ඇමති විසින් පත්කළ විශේෂඥ පිරිසක් කෙටුම්පතක් සකස් කර තිබියදී මේ පත්කිරීම සිදුකිරීමයි. කෙටුම්පතක් ඉදිරිපත් කිරීමේ බලය තිබෙන්නේ ඇමතිවරයාට. එය කැබිනට් මණ්ඩලයට ඉදිරිපත් කර පාර්ලිමේන්තුවේ සම්මත වූ පසුවයි නීතියක් බවට පත්වෙන්නේ. ඒ ක්‍රියාවලිය සම්පූර්ණයෙන් මඟහැරලා. නීතිය විකෘති කරන ක්‍රමවේදයක්. මේ වගේ තීරණ ගැනීම අධිකරණ ඇමති අපහසුතාවයට පත්කිරීමක්. අධිකරණ ඇමතිට ආත්ම ගරුත්වයක් තිබෙනවානම් ඔහු තනතුරේ දිනක් හෝ නොසිටිය යුතුයි. ඒ නිසා අපි හිතන්නේ මෙය රට තුළ ආගම් බේදයක් ඇති කිරීමට ගන්නා පියවරක් හැටියටයි. ඒ නිසා නීතියේ ආධිපත්‍ය ආරක්ෂා කර ගැනීම රටේ ජනතාවගේ ප්‍රධාන අභියෝගයක් බවට පත්වෙලා තිබෙනවා. අපි මෙය ආරක්ෂා කර ගත්තේ නැත්නම් රට තුළ ප්‍රජාතන්ත්‍රවාදය ගැන කතා කරන්න ඉඩක් නැතිවෙනවා.”

විහාරස්ථානවල කඨින පිංකම් පවත්වා අවස්ථාවන්හිදී භක්ති ගීත ප්‍රචාරය කිරීම සහ කඨින පෙරහර කටයුතුවලදී ආගමික පසුබිමක් සහිත හා ආගමික ස්ථානයකට උචිත ගීත පමණක් යොදාගන්නා ලෙස බුද්ධශාසන හා ආගමික කටයුතු අමාත්‍යාංශය ඉල්ලීමක් කරයි.

එහි ලේකම් මහාචාර්ය කපිල ගුණවර්ධන මහතා පවසන්නේ පවතින ජනප්‍රිය ගීත නොව ආගමික පසුබිමක් ඇති ගීත පමණක් ඒ සඳහා යොදා ගන්නා ලෙසයි.

කඨින පිංකම් සදහා යොදා ගන්නා ගීත හා සෞඛ්‍ය මාර්ගෝපදේශ අනුගමනය නොකිරීම ගැන සමාජ මාධ්‍ය ඔස්සේ පළවන විවේචන සම්බන්ධයෙන් ඔහු මේ බව නිවේදනයක් නිකුත් කරමින් මේ බව කියා සිටියි.

ඒ නිසා සෞඛ්‍ය මාර්ගෝපදේශ කටයුතු කරමින් කඨින පුණ්‍ය උත්සව පවත්වන්නැයි ඉල්ලා සිටින බවද එම නිවේදනයේ සඳහන් වෙයි.

‘මැණිකේ මගේ හිතේ’ ගීතය කඨින පෙරහැරවල වාදනය කිරීම මේ දිනවල සමාජ ජාලවල දැඩි විවේචනයට ලක්වෙයි.

එක රටක් එක නීතියක් සඳහා වූ ජනාධිපති කාර්‍ය සාධක බලකාය වහාම අහෝසි කරන ලෙස එක්සත් ජාතික පක්ෂය විසින් ජනාධිපති ගෝඨාභය රාජපක්ෂ වෙත දැනුම්දීමක් සිදුකර ඇත.

මේ සම්බන්ධයෙන් එක්සත් ජාතික පක්ෂය ප්‍රසිද්ධ නිවේදනයක් නිකුත්කර ඇත.

අදාළ ජනාධිපති කාර්‍ය සාධක බලකාය හේතුවෙන් රටේ මූලික ව්‍යවස්ථාවට සහ ජාතික සමගිය අර්බුද ඇතිකරන්නක් බවත් එහිදී නිදර්ශන සහිතව අවධාරණය කර ඇත.

එක්සත් ජාතික පක්ෂය නිකුත්කළ නිවේදනය පහත දැක්වෙයි.

නිදහස් ලංකාවක් බිහිවීමත් සමග ආග්‍රමාත්‍ය මහාමාන්‍යය ඩී. එස්. සේනානායක මැතිතුමා ශ්‍රී ලාංකික අනන්‍යතාවයක් බිහි කළ අතර සිංහල දෙමළ මුස්ලිම් බර්ගර් ජනතාව එක් අනන්‍යතාවයකින් ඉදිරියට ගමන් කිරීම අපගේ ජාතික ගීයේ ‘එක මවකගේ දරු කැල බැවිනා‘ යන වචන තුළින් අර්ථ ගැන්වුනා. එමෙන්ම අපගේ ව්‍යවස්ථාවේ මුලික අයිතිවාසිකම් පරිච්ජේදය තුළද එය සඳහන් වී තිබෙනවා.

ඒ අනුව අපට ඇත්තේ ශ්‍රී ලාංකික අනන්‍යතාවය තුළ ඉදිරියට ගොස් අඩුපාඩු සකසා ගැනීමයි, එම නිසා එක් රටක් එක් නීතියක් සදහා පත්කළ ජනාධිපති කාර්යසාධන බලකාය ඊට පටහැනි වනවා.

මෙම රටේ විවිධ පුද්ගල කොට්ඨාශ වෙනුවෙන් වෙනවෙනම නීති තිබු අතර අපගේ පැරණි සිංහල රාජධානියේ නීතිය අද උඩරට නීතිය ලෙස හැඳින්වෙනවා. එය අවුරුදු 700 කට වඩා පැරණි නීතියක් රෝමානු ලන්දේසි නිතියද අවුරුදු 600 කට වඩා ක්‍රියාත්මක වී තිබෙනවා.

තේසවලමේ නීතිය වසර 500 ක් පමණ පැරණි යාපනයට පමණක් අනන්‍ය වූ දකුණු ඉන්දියාවේ පවා ක්‍රියාත්මක නොවන පැරණි විශේෂ නීතියක්. එමෙන්ම මුස්ලිම් වරුන් සඳහා පවතින නීතියද දීර්ඝ කලක සිට පිළිගෙන තිබෙනවා.

මීට අමතරව නැගෙනහිර පළාතේ මුක්කුව නමින් ජනවර්ග කණ්ඩායමක් 19 වන ශතවර්ෂයේ අග බාගය දක්වා ජිවත් වූ අතර, ඔවුන්ටත් වෙනම නීතියක් පැවතුණා. 20 වන ශතවර්ෂයේදී මෙම ජන කණ්ඩායම ද්‍රවිඩ හා මුස්ලිම් ජන කොට්ඨාශ සමග මිශ්‍ර වීම හේතුවෙන් සමාජයෙන් තුරන් වුණා.

අතීතයේ පටන් විවිධ ජන කණ්ඩායම් වලට පැවති ක්‍රමවේද සහ ලක්ෂණ අප පිළිගෙන තිබෙන අතර ඒ තුළින් කිසිවෙකුටත් හානියක් සිදුවී නැත.

මෙම නීති ඉවත් කිරීම යනු සමස්ත ශ්‍රී ලංකා රාජ්‍ය වෙනුවෙන් ගොඩ නැගු නීති පද්ධතීන්ද ඉවත් කිරීම හා සමාන වනු ඇති. මෙම නීති වල පවතින අඩුපාඩු අපට සකසා ගත හැකියි.

ප්‍රධාන වශයෙන් තේසවලමේ නීතියේ විවාහ වූ කාන්තාවන්ගේ අයිතිවාසිකම් සිමා වෙලා තිබෙනවා. එම අඩුපාඩුව අපි සකස් කළ යුතුයි.

මුස්ලිම් නීතිය යටතේද ස්වාමි පුරුෂයෙකු භාර්යාවන් 04 ක් විවාහ කර ගැනීම සහ විවාහක කාන්තාවන්ට අයිතිවාසිකම් අවම වන අතර, එය සංශෝධනය කිරීමට කෙටුම්පතක් 2019 දී පැවති යහපාලන ආණ්ඩුවෙන් සකස් කළා.

එම කෙටුම්පත මේ වන විට අධිකරණ අමාත්‍ය අලි සබි්‍ර මහතා විසින් ඉදිරියට ගෙන යමින් සිටින මොහොතකයි මෙම ජනාධිපති කාර්යසාදන බලකාය පත්කර ඇත්තේ.

මීට අමතරව ශ්‍රී ලංකාවේ කාන්තාවන්ට සහ පිරිමින්ට එක හා සමාන ලෙස සැළකීම සෑම අංශයක් තුළින්ම දක්නට නොලැබෙන අතර ඒ සඳහාද නීති ඉදිරිපත් කළ යුතුයි. ඒ අනුව රටේ බහුතරය වන කාන්තාවන්ට මෙම ක්ෂේත්‍ර සදහා නීති කෙටුම්පත් කිරීම ගැටලුවක් නොවේ. ඒ පිළිබදව රට තුළ සංවාදයක් ගොඩ නැගී තිබෙනවා.

කෙසේ වුවත් පත්කර ඇති ජනාධිපති කාර්යසාධන බලකායෙන් සිදු වන්නේ එය අවුල් සහගත වීමයි එමෙන්ම ජාතික සමගිය විනාශ කිරීමයි. ජනාධිපතිවරයාට උපදෙස් සහ සහය ලබා ගැනීම අදාල විෂය භාර අමාත්‍යවරයා හෝ නීතිපතිවරයාගෙන් සිදු කළ හැකිය.

පළමුවෙන්ම සිදු කළ යුත්තේ පාර්ලිමේන්තුවේ විවාද කිරීමයි. ඉන් අනතුරුව තේරීම් කාරක සභාවක් පත්කර ඒ පිළිබද සාකච්ඡා කර ඊට අධිකරණ අමාත්‍යංශය සහ විශේෂයෙන් නීතිපතිවරයාගේ සහය ලබාගැනිමයි.

අමාත්‍ය මණ්ඩලය තුළ සාකච්ඡා නොකොට අධිකරණ අමාත්‍යවරයා සහ නීතිපතිවරයා ඉවත් කොට මේ සිදු කරන්නේ විහිලු සහගත ක්‍රියාවක් .

ජනාධිපති කාර්යභාර්ය පදනම මතත් මෙය ව්‍යවස්ථා විරෝධී ක්‍රියාවක් වනවා මෙය පාර්ලිමේන්තුවට අයත් කාර්යයක්.

ඒ නිසා රටේ එකමුතුකමට හානියක් වන එක් රටක් එක් නීතියක් සඳහා වන ජනාධිපති කාර්යසාධන බලකාය වහාම අහෝසි කරන ලෙස ජනාධිපති ගෝඨාභය රාජපක්ෂ මැතිතුමාට දැනුම් දෙමු.

රටේ විශ්‍රාමිකයින්ගේ විශ්‍රාම වැටුප අන්තනෝමතික ලෙස කොල්ලකෑමට ආණ්ඩුව තීරණය කර ඇතැයි, විපක්ෂ නායක සජිත් ප්‍රේමදාස පවසයි.

ඔහු  මේ අදහස් පළ කළේ, ඊයේ= පස්වරුවේ නැදිගම්විල රාජමහා විහාරයට ගොස්, අමරපුර සිරි සද්ධම්ම යුත්තික මහා නිකායේ අනුනායක අතිපූජ්‍ය උයන්වත්තේ සද්ධාරාම හිමියන් බැහැදැක ආශිර්වාද ලබාගැනීමෙන් අනතුරුවයි.

විපක්ෂ නායකවරයා පවසන්නේ, ලක්ෂ සංඛ්‍යාත විශ්‍රාමිකයන්ගේ විශ්‍රාමික දීමනාව ක්‍රමෝපායිකව කප්පාදු කිරීමේ කූට වැඩපිළිවෙලක් දියත් කර ඇති බවයි. ‍

”වයස අවුරුදු 70ට වැඩි අයගෙන් 600 ක් කපාගන්නට වයස අවුරුදු 70ට අඩු අයිතීන් රුපියල් 400 කපාගන්න අලුත් චක්‍රලේඛයක් ඔක්තෝබර් 29 වැනිදා මේ වසරේ ප්‍රකාශයට පත් කරලා තියනවා..”

විශ්‍රාමිකයින්ට දැනුම්දීමක් සිදු නොකර මේ මුදල කපා ගන්නා බවට ද විපක්ෂ නායකවරයා චෝදනා කර සිටී.

”විශ්‍රාමිකයාට දැනුම්දීලා නෙවෙයි මේ මුදල කපාගන්නේ. සිදුවිය යුතුව තිබුණද ඒ අදාළ විශ්‍රාමිකයින්ගේ මූලිකව අනුමැතිය ගත යුතුයි, සති දෙකක් තුළ විශ්‍රාම වැටුප් දෙපාර්තමේන්තුවට දැනුවත් කිරීමක් නොකළොත් තමන්ගේ විරෝධතාවය පිළිබඳව ආපසු හරවන්නට බැරි විශ්‍රාම වැටුප් දීමනා කප්පාදුව හැටියට මේක ඉදිරියට යනවා. මේ රටේ විශ්‍රාමික ප්‍රජාවට මං පැහැදිලිව කියන්න ඕන කරුණා කරලා මේ ඇස් බැන්ඳුම් ක්‍රියාවලියට ඔබ සියලු දෙනා අවදිව කටයුතු කරන්න. කොලේ වහලා කප්පාදු කරන වැඩපිළිවෙළට වහා නතර කරන්න එසේ නොකර හොත් අපි අනිවාර්යෙන්ම විශ්‍රාමික ප්‍රජාව වෙනුවෙන් මහ පාරට බහිනවා. කියන එක මේ අවස්ථාවේ ආණ්ඩුවට කියන්න කැමතියි”

"ඒ අය කියන දේ අසා සිටීමට ඒ අය ‌අපේ බාප්පලාදැයි" විමසමින් ආණ්ඩුවේ සෙසු පක්ෂ විවේචනය කරන පාර්ශ්ව වෙත ප්‍රබල ප්‍රහාරයක් හිටපු ජනාධිපති මෛත්‍රීපාල සිරිසේන විසින් එල්ල කර ඇත.

ශ්‍රී ලංකා නිදහස් පක්ෂයේ සභාපති මෙන්ම වත්මන් ආණ්ඩු පාර්ශ්වයේ මන්ත්‍රීවරයකු වන හිටපු ජනාධිපති මෛත්‍රීපාල සිරිසේන මේ ප්‍රතිචාරය දක්වා සිටියේ ආණ්ඩු පක්ෂ මන්ත්‍රී තිස්ස කුට්ටිආරච්චි සිදුකළ ප්‍රකාශයක් සම්බන්ධයෙන් මාධ්‍ය කළ විමසීමේදී ය.

කුට්ටිආරච්චි මන්ත්‍රීවරයා කියා සිටියේ තාච්චියට අවශ්‍ය ලෙස ආප්පය හැසිරිය යුතු බවත්, ආප්පයට අවශ්‍ය පරිදි තාච්චිය නොහැසිරෙන බවත්ය.

වත්මන් කැබිනට් මණ්ඩලය අසාර්ථක බව පාර්ලිමේන්තු මුදල් කාරක සභා සභාපති , පාර්ලිමේන්තු මන්ත්‍රී අනුර ප්‍රියදර්ශන යාපා පවසයි.

පවතින තත්ත්වය අනුව තමන්ට ඇමැති ධූරයක් ලබා දුන්නද බාර නොගන්නා බවත් ඔහු සඳහන් කර ඇත.

අද ආණ්ඩුව කරන කිසි දෙයක් ජනතාව නොදන්නා බවත්, ඇමැතිවරු පවා කියන කරුණු පිළිබද විශ්වාසයක් නැති බවත් මන්ත්‍රීවරයා වැඩිදුරටත් සඳහන් කර මේ තත්ත්වය යටතේ විකල්පයක් බලයට ඒම වැළැක්විය නොහැකි බවත් පවසා ඇත.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ සුසිල් ප්‍රේමජයන්ත රාජ්‍ය අමාත්‍යවරයාට පසුව මෙතෙක් පොදුජන පෙරමුණ තුළ සිටිමින් අනුර ප්‍රියදර්ශන යාපා මන්ත්‍රීවරයා සිදුකළ ප්‍රකාශය බරපතළ ලෙස සැලකිය යුතු බවයි.

එසේම ආණ්ඩුවට සම්බන්ධ කොමියුනිස්ට් පක්ෂයේ ප්‍රබලයකු වන ඩීව් ගුණසේකර හිටපු අමාත්‍යවරයා ද ආණ්ඩුව දැඩිව විවේචනය කළ බවත් මේ හරහා බිම්මට්ටම තේරුම් ගැනීම කොහෙත්ම දුෂ්කර නොමැති බවත් එය පැහැදිලි ආණ්ඩුවේ කඩා වැටීමේ පෙරමග සම්බන්ධයෙන් තහවුරුවක් බවත් විචාරක මතය වී ඇත.

ලංකා ඉතිහාසයේ සිටින හොදම අධිකරණ අමාත්‍යවරයා අලි සබ්‍රි බව ජනමාධ්‍ය අමාත්‍ය ඩලස් අලහප්පෙරුම පවසයි.

ඩලස් අලහප්පෙරුම අමාත්‍යවරයා මේ බව සඳහන් කර සිටියේ මාතර පැවති උත්සවයකදී අදහස් දක්වමින් ය.

යල් පැන ගිය නීති වෙනස් කිරීම සදහා අලි සබ්‍රි අමාත්‍යවරයා දැඩි වෙහෙසක් ගන්නා බවත්, කැබිනට් මණ්ඩලයට වැඩිම කැබිනට් පත්‍රිකා ඉදිරිපත් කරන අමාත්‍යවරයා අලි සබ්‍රි බවත් ඩලස් අලහප්පෙරුම අමාත්‍යවරයා සඳහන් කර ඇත.

හොඳම අඅධිකරණ ඇමති ඉල්ලා අස්වීම දීලා ?

කෙසේ වුවත් මේ වන විට මාධ්‍ය වාර්තා පළවෙමින් ඇත්තේ අලි සබ්‍රි අමාත්‍යවරයා සිය අමාත්‍ය ධූරයෙන් මෙන්ම පාර්ලිමේන්තු මන්ත්‍රී ධූරයෙන් ඉල්ලා අස්වීමේ ලිපි 2ක් ඊයේ (05) වන විට ජනාධිපති ගෝඨාභය රාජපක්ෂ වෙත යොමුකර ඇති බවයි.

ඊට හේතු ලෙස සඳහන් වන්නේ එක රටක් එක නීතියක් ජනාධිපති කාර්‍ය සාධක බලකායට බොදු බල සේනා සංවිධානයේ මහ ලේකම් ගලගොඩඅත්තේ ඥානසාර හිමිගේ පත්කිරීම සම්බන්ධයෙන් පැහැදීමක් නොමැති වීමයි.

වාර්තා වන ආකාරයට අදාළ ඉල්ලා අස්වීම ජනාධිපති භාරගෙන නැත. කෙසේ වුවත් අලි සබ්‍රි අමාත්‍යවරයා ගේ අදහස ලෙස සඳහන් වන්නේ ඥානසාර හිමිගේ පත්වීම අනවශ්‍ය ප්‍රශ්න ඇතිකරන්නක් විය හැකි බවයි.

මුතුරාජවෙළ පරිසර කලාපයේ විශාල ප්‍රමාණයේ හෙලිකොප්ටර් අංගනයක් සෑදීමට අනුමැතිය ලබාදීමේ සිද්ධියක් සම්බන්ධයෙන් වාර්තාවක් වහාම ඉදිරිපත් කරන ලෙස රජයේ ගිණුම් පිළිබඳ පාර්ලිමේන්තු කාරක සභාව ( කෝපා කමිටුව ) වනජීවී අධ්‍යක්ෂ ජනරාල් චන්දන සූරියබණ්ඩාර මහතාට දැනුම්දී ඇත.

මේ සම්බන්ධයෙන් අප වනජීවී අධ්‍යක්ෂ ජනරාල්වරයාගෙන් කළ විමසුමකදී ඔහු පැවසුවේ එම කාරණය සම්බන්ධයෙන් නිරීක්ෂණ ඉදිරිපත් කිරීමට තමා කටයුතු කරන බවයි.

මේ අතර ඇතැම් පිරිස් මුතුරාජවෙල තෙත්බිම් කලාපයට අනවසරෙන් ඇතුළුවී එම පරිසර පද්ධතියට බලපෑම් වන ආකාරයේ කටයුතුවල යෙදෙන බවට තොරතුරු අනාවරණයවී ඇතැයි පවසන කමිටුව එම ක්‍රියාකාරකම් නැවැත්වීමට වහාම පියවර ගන්නැයි අදාළ අංශවලට උපදෙස් දුන්නේය.

එසේම පරිසරයට බලපෑම්වන ව්‍යාපෘතිවල බලපත්‍ර අත්හිටුවන ලෙසටද නියෝග කර ඇත.

මුතුරාජවෙල වගුරු බිමෙන් පර්චස් හැටපන් දහස් එකසිය දෙකක්( 65102ක් ) පර්චසය රුපියල් 500 බැගින් මිලදී ගැනීමට පෞද්ගලික සමාගමක් කටයුතු කර ඇති බවත් ඒ සඳහා උදව් කළ ගොවිජන සේවා නිලධාරීන්ට විරුද්ධව කිසිදු පරීක්ෂණයක් පවත්වා නැති බවත් රජයේ ගිණුම් පිළිබඳ පාර්ලිමේන්තු කාරක සභාව පවසයි.

කඩා ඉවත් කෙරෙන ගොඩනැගිලිවල අබලි ද්‍රව්‍ය සහ වෙනත් අපද්‍රව්‍ය මුතුරාජවෙල පරිසර කලාපයට බැහැර කරන අයට එරෙහිව දැඩි නීතිමය පියවර ගන්නා ලෙස කමිටුව නාගරික සංවර්ධන අධිකාරියට සහ අදාළ පළාත් පාලන ආයතනවලට නියෝග කළේය.

හෙක්ටයාර් 6232ක්වන මුතුරාජවෙල රක්ෂිතයේ හෙක්ටයාර් 3068 ක් පාරිසරික වශයෙන් වැදගත් තෙත් බිම් කලාපයක් ලෙස හඳුනාගෙන ඇති බව කෝපා කමිටු වාර්තාවක සඳහන් වේ.

මුතුරාජවෙල පරිසර පද්ධතිය සම්බන්ධයෙන් පරිසර ලේකම්වරයාගේ ප්‍රධානත්වයෙන් සහ අදාල ආයතනවල සහභාගිත්වයෙන් කමිටුවක් පිහිටුවා එම පරිසර පද්ධතිය ආරක්ෂා කිරීමට විධිමත් ක්‍රියාමාර්ග ගන්නා ලෙසටද රජයේ ගිණුම් පිළිබඳ පාර්ලිමේන්තු කාරක සභාවේ සභාපති මහාචාර්ය තිස්ස විතාරණ මහතා එම කමිටු රැස්වීමකදී උපදෙස්දී ඇත.

– lankadeepa

සතොස මගින් අත්‍යවශ්‍ය භාණ්ඩ මිලදී ගැනීමේදී තවත් භාණ්ඩ මිලදී ගැනීමට පනවා තිබූ කොන්දේසි ඉවත් කර තිබේ.

වෙළෙඳ අමාත්‍ය බන්දුල ගුණවර්ධන පැවසුවේ අද (06) සිට ක්‍රියාත්මක වන පරිදි එම ඉවත් කිරීම සිදුකර ඇති බවය.

සීනි වැනි අත්‍යවශ්‍ය භාණ්ඩ මිලදී ගැනීමේදී පාරිභෝගිකයින් සඳහා මෙම කොන්දේසි පනවා තිබුණි.

යහපාලන රජය සමයේදී අයවැය පරතරය 5.5% දක්වා රැගෙන ආ බවත්, එය 3.5% දක්වා ගෙනයාමේ වැඩපිළිවෙලක් ක්‍රියාත්මක කරමින් සිටි බවත් පාර්ලිමේන්තු මන්ත්‍රී ඉරාන් වික්‍රමරත්න  පවසයි.

කෙසේ නමුත් වත්මන් ආණ්ඩුව යටතේ පසුගිය වසරේදී අයවැය පරතරය 14% ක් දක්වා ඉහළ ගොස් ඇති බවයි මන්ත්‍රීවරයා පෙන්වා දෙයි.

ජීවන වියදම හේතුවෙන් දැඩිලෙස අසරණ වී සිටින ජනතාව අයවැයෙන් හෝ සහන ලැබෙනු ඇතැයි බලාපොරොත්තුවෙන් සිටින නමුත් එයද ඉටු නොවන බලාපොරොත්තුවක් වී ඇති බව ඉරාන් වික්‍රමරත්න සඳහන් කරයි.

මුදල් අමාත්‍ය බැසිල් රාජපක්ෂ, ජනතාවට ලබාදීම නොව ජනතාගෙන් ලබා ගැනීමට සිදුවන තත්වයක් එලඹ ඇතැයි පවසන්නේ ඒ නිසා බවද මන්ත්‍රීවරයා සඳහන් කරයි.

සහල් පෝලිම්, සීනි පෝලිම්, ගෑස් පෝලිම්, සිමෙන්ති පෝලිම් පමණක් නොව මේ වනවිට තරුණ තරුණියන් දහස් ගණනක් රටින් පිටව යාම සඳහාද පැය ගණන් පෝලිම්වල රස්තියාදුවෙමින් සිටින බවද මන්ත්‍රීවරයා පෙන්වා දෙයි.

ශ්‍රී කල්‍යාණි උභය රාජමහා විහාරාධිපති, ජ්‍යෙෂ්ඨ මහාචාර්ය, පුජ්‍ය කොල්ලුපිටියේ මහින්ද සංඝරක්ඛිත හිමි කැලණිය විශ්වවිද්‍යාලයේ කුලපති ලෙස පත් කර තිබේ.

කොළඹ හලාවත දෙදිසාවේ ප්‍රධාන සංඝ නායක අපවත්වී වදාළ පූජ්‍ය ආචාර්ය වැලමිටියාවේ කුසලධම්ම නා හිමියෝ මීට පෙර කැලණිය විශ්වවිද්‍යාලයේ කුලපති ධුරය හෙඹවූහ.

මේ අතර නොවැම්බර් මස 17 වනදා සිට ක්‍රියාත්මක වන පරිදි පූජ්‍ය මුරුත්තෙට්ටුවේ ආනන්ද හිමියන් කොළඹ විශ්වවිද්‍යාලයේ කුලපති ධුරය සඳහා පත් කළ බව පසුගියදා නිවේදනය කෙරිණ.

කොන්දේසි දමා සතොස භාණ්ඩ විකුණන බවත් එය නීති විරෝධී බවත් දක්වමින් වෙළෙඳ අමාත්‍ය බන්දුල ගුණවර්ධන ට එරෙහිව බරපතළ චෝදනාවක් පාරිභෝගික අයිතීන් සුරැකීමේ ජාතික ව්‍යාපාරය විසින් එල්ල කර ඇත.

ඊට අදාළ නිකුත්කළ නිවේදනය පහත දැක්වෙයි.

කොන්දේසි දමා භාණ්ඩ විකිණීමට වෙළද ඇමතිගේ උත්සහය නීති විරෝධීයි.

සතොස අලෙවිසැල් හරහා සීනි හා සහල් මිලදී ගැනීමට නම් වෙනත් භාණ්ඩ මිලදී ගතයුතු බවට වෙළද අමාත්‍ය බන්දුල ගුණවර්ධන විසින් පසුගියදා කළ ප්‍රකාශය 2003 අංක 9 දරණ පාරිභෝගික කටයුතු අධිකාරී පනතට සම්පූර්ණ පටහැනි ප්‍රකාශයකි. කිසිදු කොන්දේසියක් දමා භාණ්ඩ විකිණීම උක්ත නීතියෙන් තහනම් කොට ඇත.

ඒ පිළිබදව 2003 අංක 9 දරණ පාරිභෝගික කටයුතු අධිකාරී පනතේ 16(ආ) වගන්තියේ පැහැදිලිව සදහන් කර ඇත. පනතේ එසේ සදහන්ව තිබියදී එම නීතිය උල්ලංඝණය කිරීමට උත්සහකිරීම අප සංවිධානය දැඩිව හෙළාදකින අතර ‌2003 අංක 9 දරණ පාරිභෝගික කටයුතු අධිකාරී පනත හොදින් කියවන ලෙස අප වෙළද අමාත්‍යවරයාට අවධාරණය කරන අතර මීට පෙර සතොස ආයතනය පාරිභෝගිකයින්ට කොන්දේසි දමා භාණ්ඩ අලෙවි කිරීමක් පිළිබදව අප විසින් කරන ලද පැමිණිල්ලකට අනුව අධිකරණය විසින් දඩ නියමකර ඇත.

කිසියම් වෙළෙන්දෙකු හෝ ආයතනයක් භාණ්ඩ අලෙවි කිරීමේදී කුමන හෝ කොන්දේසියක් දමන්නේනම් පාරිභෝගික අධිකාරියේ 1977 දුරකතන අංකයට පැමිණීල කරන ලෙස අප පාරිභෝගිකයින්ගෙන් ඉල්ලා සිටිමු.

2003 අංක 9 දරණ පාරිභෝගික කටයුතු අධිකාරී පනතේ 16(ආ) වගන්තිය

ගැණූම්කරු විසින් භාණ්ඩයෙහි මිල නොපමාව ගෙවිය යුතු යුතුය යන කොන්දේසිය හැර වෙනත් යම් භාණ්ඩයක් මිලට ගැනීම නියම කිරීමේ හෝ යම් සේවාවක් වෙනුවෙන් යම් ගෙවීමේ කිරීමේ කොන්දේසියකට හෝ වෙනත් යම් කොන්දේසියකට හෝ යටත්ව ඒ් භාණ්ඩය විකිණීම සදහා ඉදිරිපත් කිරීම නොකළයුතුය.

රංජිත් විතානගේ

සභාපති

පාරිභෝගික අයිතීන් සුරැකීමේ ජාතික ව්‍යාපාරය

අග්‍රාමාත්‍ය මහින්ද රාජපක්ෂ පසුගියදා පැවති පොදුජන පෙරමුණේ ජාතික සමුළුව අවස්ථාවේ සෙසු පක්ෂ සහ පොදුජන පෙරමුණ අතර සංහිඳියාවක් යෝජනා කෙරුණත් ඒ නොතකා එම පාර්ශ්වයේ මැති ඇමතිවරුන් කටයුතු කරන බවක් පෙන්නුම් කරයි.

ඒ අනුව යමින් ශ්‍රී ලංකා නිදහස් පක්ෂයට ප්‍රහාරයක් එල්ල කිරීමට රාජ්‍ය අමාත්‍ය දිලුම් අමුණුගම කටයුතු කර ඇත.

ඒ ශ්‍රීලනිප යටින් පහර දීමේ න්‍යාය හා දෙබිඩි පිළිවෙත රජයේ සාමූහිකභාවය තර්ජනයක් බව පවසමිනි.

ශ‍්‍රී ලංකා නිදහස් පක්ෂය හැකි සෑම අවස්ථා දීම රජයට පහර දෙන බව දැකිය හැකි බව ද ඔහු කියා සිටියි.

ඔහු මේ බව සඳහන් කළේ කටුගස්තොට ප්‍රදේශයේ පැවති උත්සව අවස්ථාවකින් මාධ්‍යවේදීන් කළ විමසීමකට ප්‍රතිචාර දක්වමිනි.

යටින් පහරදීම ශ්‍රී ලංකා නිදහස් පක්ෂය මුලසිටම කරන දෙයක් බවත් එම තත්ත්වය ඉදිරියට ද බලාපොරොත්තු වන බවත් එහිදී ඇමැතිවරයා පැවැසීය.

දරුවන් අතර කොරෝනා වෛරසය අසාදනය වීම ඉහළ ගොස් ඇතැයි රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා සඳහන් කරයි.

පසුගිය දින කිහිපය තුළ එම වැඩිවීම පෙනී යන බවද ඔහු පැවසීය.

විශේෂඥ වෛද්‍යවරයා මෙසේ අදහස් දක්වා සිටියේ කොළඹ පැවති මාධ්‍ය හමුවකදී අදහස් දක්වමින් ය.

පවතින තත්ත්වය හමුවේ දෙමාපියන් ලෙස කළ යුතු වන්නේ දරුවන් ද රැකගෙන පාසල් පද්ධතිය අඛණ්ඩව පවත්වාගෙන යාමට සහාය ලබා දීම බව ද ඔහු පවසයි.

කොරෝනා ව්‍යාප්තිය දරුවන් අතර තවදුරටත් ඉහළ ගියහොත් පාසැල් පද්ධතිය ද වසා දැමීමට සිදු වනු ඇති බවද පැවසූ ඔහු ඒ නිසා දරුවන්ට අධ්‍යාපන කටයුතු අඛණ්ඩව කරගෙන යාමට ජනතාව සහ යෙදිය යුතුව සඳහන් කළේය.

දරුවන් සහ දරුවන්ගේ අධ්‍යාපනය රැකගැනීම සඳහා අනවශ්‍ය ගමන් බිමන් වහාම නවතා දමන්නැයිද ඔහු ඉල්ලා සිටියේය.

මුතුරාජවෙල තෙත්බිම් කලාපයත් ඇතුළත් මෙරට බටහිර වෙරළ තීරය පෞද්ගලික අංශයට විකුණා ඇතැයි සමගි ජන බලවේගය පාර්ලිමේන්තු මන්ත්‍රී හරීන් ප්‍රනාන්දු සඳහන් කරයි.

ඔහු මේ බව සඳහන් කර සිටියේ මාධ්‍ය හමුවකදී අදහස් දක්වමින් ය.

මුතුරාජවෙල තෙත්බිම් කලාපය වනජීවී හා වන සංරක්ෂණ දෙපාර්තමේන්තුවෙන් නාගරික සංවර්ධන අධිකාරියට පවරා ගැනීමෙන් අනතුරුව මෙසේ විකුණා ඇතැයිද ඔහු එහිදී පැවසීය.

අද වන විට එම බිම් කොටස් විකුණා දමා මුදල්ද ලබාගෙන අවසන් යයිද මන්ත්‍රීවරයා පවසයි.