විශේෂාංග

"වෙඩි තිබ්බේ පිටිපස්සෙන් නම්... ජනාධිපතිගේ ඔළුව පිටිපස්සට විසි වුණේ ඇයි? ලෝකයේ බලවත් ම මිනිසාව (JFK) මහ දවල් ඝාතනය කළ 'මැජික් උණ්ඩයේ' (Magic Bullet) නොවිසඳුණු අභිරහස"

"ඩිෂුම්!"

1963 නොවැම්බර් 22 වැනිදා දහවල් 12.30යි. ඇමරිකාවේ ටෙක්සාස් ප්‍රාන්තයේ ඩැලස් නුවර වීදි දිගේ ගමන් කරන සුඛෝපභෝගී විවෘත ලිමොසින් රථයේ හිටියේ ලෝකයේ බලවත් ම මිනිසා, ජෝන් එෆ්. කෙනඩි සහ ඔහුගේ බිරිඳ ජැකලින්. අහස පැහැදිලියි. පාර දෙපැත්තේ දහස් ගණන් ජනතාව අත් වනනවා. කිසිම කෙනෙක් හිතුවේ නෑ තව තත්පර කිහිපයකින් මුළු ලෝකයේම ඉතිහාසය වෙනස් වෙන්න යනවා කියලා. වාහන පෙළ ඩැලස්වල තියෙන පැරණි පොත් ගබඩාව පහු කරනවාත් එක්කම මුළු නගරය ම දෙදරවන ශබ්දයක් ඇහුණා. "ඩිෂුම්!" පළමු වෙඩි උණ්ඩය ජනාධිපතිවරයාගේ බෙල්ල හරහා ගියා. ඔහු දෑතින්ම බෙල්ල අල්ලගත්තා. තත්පර ගාණක් යන්න කලින් දෙවැනි වෙඩි හඬත් ඇහුණා. තුන්වැනි උණ්ඩය... කාටවත් හිතාගන්නවත් බැරි විදියට කෙළින්ම කෙනඩිගේ හිස් කබල කුඩු කරගෙන ගියා. ලේ සහ මොළයේ කොටස් විසිරිලා යද්දී, බිරිඳ ජැකලින් මරණ බියෙන් කෑ ගහගෙන කාර් එකේ පිටිපස්සට පැන්නා. ඒ දර්ශනය දැකපු මුළු ලෝකයම ගල් ගැහුණා.

'මම කාටවත් වෙඩි තිබ්බේ නෑ...'

පොලීසිය විනාඩි ගාණක් ඇතුළත වෙඩි තියපු පුද්ගලයා අල්ලගත්තා. ඔහු නමින් ලී හාවි ඔස්වල්ඩ්. හිටපු නාවික සෙබළෙක්. පොලීසිය සහ FBI ආයතනය කිව්වේ ඔහු අර පොත් ගබඩාවේ 6වන මහලේ ජනේලයෙන් තනියම වෙඩි තිබ්බා කියලයි. කතාව එතැනින් ඉවර වෙන්න තිබුණා. නමුත් නියම අභිරහස පටන් ගත්තේ එතැනින්.

ඔස්වල්ඩ්ව උසාවියට ගෙනියන්න කලින්, පොලිස් ස්ථානය ඇතුළෙ දී ම ජැක් රූබි කියන නයිට් ක්ලබ් අයිතිකාරයෙක් ඇවිත්, පොලිස් නිලධාරීන් බලාගෙන ඉද්දීම ඔස්වල්ඩ්ට වෙඩි තියලා මැරුවා! ඇයි එහෙම කළේ? ඔස්වල්ඩ්ට කට අරින්න දුන්නේ නැත්තේ ඇයි? ඔහු මැරෙන්න කලින් මාධ්‍යවේදීන්ට කෑ ගහලා කිව්වා "මම නිකම් ම බිල්ලක් (I'm just a patsy)! මම කාටවත් වෙඩි තිබ්බේ නෑ" කියලා.

ලෝකය ම අසන ප්‍රශ්නය

මෙහි තියෙන ලොකුම ආන්දෝලනය තමයි 'මැජික් උණ්ඩය' (Magic Bullet Theory). එදා සිද්ධිය වීඩියෝ කරපු 'ඒබ්‍රහම් සපෘඩර්' (Abraham Zapruder) ගේ කැමරා දර්ශන හොඳින් බැලුවම, අන්තිම වෙඩි උණ්ඩය වැදුණු ගමන් කෙනඩිගේ ඔළුව වේගයෙන් පිටිපස්සට (Back and to the left) විසි වෙනවා. සාමාන්‍ය මිනිස්සු හිතන්නේ, ඔළුව පස්සට විසි වුණා නම් වෙඩි තියන්න ඕන අනිවාර්යයෙන්ම ඉස්සරහින් කියලයි. එහෙම නම් ඔස්වල්ඩ්ට අමතරව තව වෙඩික්කාරයෙක් (Second Shooter) ඉස්සරහ තිබුණු "Grassy Knoll" කියන තණකොළ කණ්ඩියේ හැංගිලා හිටියද? මේක තමයි ලෝකෙ ම අහන ප්‍රශ්නය.

නමුත් ඇත්තට ම විද්‍යාව කියන්නේ මොකක්ද? මේ සිද්ධිය ගැන කරපු මරණ පරීක්ෂණ වාර්තාවලට (Autopsy) සහ එක්ස්-රේ (X-rays) පරීක්ෂණවලට අනුව, වෛද්‍යවරුන් තහවුරු කළේ වෙඩි උණ්ඩ ඇතුළු වී තිබෙන්නේ පිටුපසින් (Rear) බවයි. ඔවුන්ට අනුව හිස් කබලේ පිටුපස කුඩා ඇතුල්වීමේ තුවාලයක් (Entry Wound) සහ ඉස්සරහින් විශාල පිටවීමේ තුවාලයක් (Exit Wound) තිබුණා. එහෙනම් ඇයි ඔලුව පස්සට ගියේ? භෞතික විද්‍යාඥයින් කියන්නේ උණ්ඩය ඉස්සරහින් එළියට විසි වෙද්දී ඇතිවන 'ප්‍රතික්‍රියාව' (Jet Effect) සහ මොළයේ ස්නායුවලට වෙන හානිය (Neuromuscular reaction) නිසා ශරීරය පස්සට ගැස්සුණා කියලයි.

කොහොම වුණත්, විද්‍යාව මොනවා කිව්වත්, තමන්ගේ ඇස් දෙකෙන් දකින දේ (වීඩියෝව) බොරුයි කියලා හිතාගන්න අමාරු වීම නිසා, අදටත් ගොඩක් අය විශ්වාස කරන්නේ මේක එක්කෙනෙක් කරපු වැඩක් නෙවෙයි කියලයි.

කුඩය ඉහලූ මිනිසා

මෙන්න මේ කතාව තවත් අවුල් කරන, කාටවත් හිතාගන්න බැරි අභිරහස් කරුණු දෙකක්. පළවෙනි එක තමයි 'කුඩය ඉහලපු මිනිසා' (Umbrella Man). එදා ඩැලස් නුවරට තිබුණේ තද අව්වක්. වලාකුළක්වත් නෑ. කා අතේවත් කුඩයක් තිබුණේ නෑ. හැබැයි පුදුමයකට වගේ කෙනඩිගේ කාර් එක එන වෙලාවෙ ම, පාර අයිනේ හිටපු එක අමුතු මනුස්සයෙක් හදිසියේම කළු පාට කුඩයක් ඉහලනවා. ඒ කුඩය ඉහලපු තත්පරේම තමයි කෙනඩිට පළවෙනි වෙඩි උණ්ඩය වදින්නේ. මේක අහම්බයක්ද? සමහරු කියන්නේ ඒ කුඩයෙන් වෙඩික්කාරයාට 'දැන් වෙඩි තියන්න' කියලා සිග්නල් (Signal) එකක් දුන්නා කියලයි. තවත් අය කියන්නේ ඒ කුඩේ ඇතුලේ විශේෂ 'වස විදින තුවක්කුවක්' (Poison Dart Gun) තිබුණා කියලයි. අදටත් ඒ මනුස්සයා කවුද, ඇයි එදා කුඩයක් ඉහලුවේ කියන එක කාටවත් හොයාගන්න බැරි වුණා.

අතුරුදන් වූ මොළය

දෙවැනි කාරණය ඊටත් වඩා බියජනකයි. ඒ තමයි 'අතුරුදන් වූ මොළය'. කෙනඩිගේ පශ්චාත් මරණ පරීක්ෂණයේ දී, වෛද්‍යවරු ඔහුගේ මොළය වැඩිදුර පරීක්ෂණ සඳහා ආරක්ෂිතව තිබ්බා. නමුත්... පස්සේ කාලෙක ඒ පරීක්ෂණ වාර්තා නැවත තහවුරු කරගන්න (Re-examine) බලද්දී, ඒ මොළය අභිරහස් ලෙස අතුරුදහන් වෙලා! ආණ්ඩුව කිව්ව විදියට වෙඩි තිබ්බේ පිටිපස්සෙන් නම්, ඒකේ සාක්ෂිය වුණු මොළය හංගන්න ඕන නෑනේ? මොළය තිබුණා නම් අදටත් කාටවත් සැකයක් නැතුව වෙඩි වැදුණු දිශාව ඔප්පු කරන්න තිබුණා.

දෛවයේ සරදමක් ද...?

නමුත් මේ මුළු කතාවම තවත් අවුල් කරන, කාටවත් ම හිතාගන්න බැරි අද්භූත සිදුවීමක් තියෙනවා. ඒ තමයි ඇමරිකාවේ ඝාතනයට ලක්වුණු අනෙක් ප්‍රසිද්ධම ජනාධිපතිවරයා වන 'ඒබ්‍රහම් ලින්කන්' සහ 'ජෝන් එෆ්. කෙනඩි' අතර තියෙන පුදුමාකාර සමානකම්. ලින්කන් ජනාධිපති වුණේ 1860 දී. කෙනඩි ජනාධිපති වුණේ 1960 දී. හරියටම අවුරුදු 100කට පස්සේ. ඒ විතරක් නෙවෙයි, මේ දෙන්නට ම වෙඩි තිබ්බේ ඔළුවට. දෙන්නම වෙඩි කද්දී ළඟ හිටියේ තමන්ගේ බිරිඳ. පුදුම හිතෙන දේ තමයි, ලින්කන් මැරුණේ 'Ford' රඟහලේ දී. කෙනඩි මැරුණේ 'Ford' (Lincoln) සමාගමේ කාර් එකක දී. ලින්කන් මැරුණට පස්සේ ජනාධිපති වුණේ 'ජොන්සන්'. කෙනඩි මැරුණට පස්සේ ජනාධිපති වුණෙත් 'ජොන්සන්'. මේවා නිකම්ම අහඹු සිදුවීම් ද? නැත්නම් අවුරුදු 100කට සැරයක් ඉතිහාසය ආපහු සිද්ධ වෙනවාද? (History Repeats Itself). දෛවයේ සරදම කියන්නේ මේකටයි.

Classified Files

මේක තනි පිස්සෙක්ගේ වැඩක් ද, නැත්නම් ඇමරිකාව ඇතුළෙ ම හිටපු අය ගහපු ගේමක් ද, කෙනඩි කියන්නේ වියට්නාම් යුද්ධය නවත්වන්න හදපු, CIA එකේ බලය අඩු කරන්න හදපු නායකයෙක්. ඔහුගේ මරණයෙන් ප්‍රයෝජන ගත්තේ කවුද? යුද්ධයෙන් සල්ලි හොයන ආයුධ සමාගම් ද, නැත්නම් මාෆියාව ද? අදටත් ඇමරිකානු රජය මේ ඝාතනයට අදාළ සමහර ෆයිල්ස් (Classified Files) එළියට දෙන්නේ නෑ. අවුරුදු 60කට පස්සෙත් ලෝකයෙන් හංගන්න තරම් දෙයක් ඒ ෆයිල් අස්සේ තියෙනවා ද?

කෙනඩි ඝාතනය කියන්නේ ඇමරිකාවේ ප්‍රජාතන්ත්‍රවාදය මහ දවාලේ ඝාතනය වුණු දවසයි. සත්‍යය කවදා හරි එළියට එයි ද, නැත්නම් ඒක සදහට ම සොහොනක වැළලී යයි ද?

ඔබ හිතන්නේ වෙඩි තිබ්බේ කවුද? ඔස්වල්ඩ් තනියම ද? නැත්නම් තව කෙනෙක් හිටිය ද?

(උපුටා ගත්තේ නොකී කතා - Untold Stories face book පිටුවෙන්)